أعرب الإعلامي أحمد موسى، عن استيائه الشديد من عودة الارتفاع الجنوني لسعر الدولار أمام الجنيه، قائلًا: "إيه المأساة اللي إحنا فيها دي، دا قرب من الـ18، وبالتالي كل حاجة هتزيد في البلد، عشان نكون واضحين، رغم أننا مش ناقصين غلاء".
وأضاف "موسى"، في برنامجه "على مسئوليتي" المذاع على قناة "صدى البلد": "لأول مرة في تاريخ مصر يصل الدولار الجمركي إلى 17 جنيها بسبب جنون الدولار، مأساة، حاجة صعبة، البلد كلها هتتأثر".
وتابع: "لازم أقول كلمة حق، كل حاجة هتغلى ومفيش حاجة هترخص أبدا، ننتظر ارتفاع الأسعار تاني، مفيش حل غير الزراعة، واجتماع السيسي النهارده مع رئيس الوزراء وزير الزراعة عشان أكل الناس، عمال يشكي لهم غلاء الأسعار".
واستطرد: "والله العظيم دا ظلم وحرام، الناس زهقانة، الله يكون في عونهم الأيام المقبلة، الحاجة هتزيد هتزيد، انسى إن حد يقول الحاجة هترخص، مش عارفين هنعمل إيه"، موضحًا: "الناس ميهمهاش إلا الأكل، ولو أكل المواطن زاد هيبقى عندنا أزمة حقيقية".
